Tennis: Niyigena, Muhire na Ishimwe bananiwe kwinjira muri ‘Rwanda Challenger 75’
Yanditswe: BYIRINGIRO ISRAEL
Itariki:
2025-02-24 06:12:13
Abanyarwanda Niyigena Étienne, Muhire Joshua na Ishimwe Claude basezerewe mu Irushanwa Mpuzamahanga rya Tennis “ATP Challenger 75 Tour” batarenze ijonjora ryari kubafasha kwinjira mu bakinnyi 32 bakomeye bazakina iri rushanwa.Ku Cyumweru, tariki ya 23 Gashyantare 2025, ni bwo ku bibuga bya Tennis biherereye muri IPRC Kigali hatangiye imikino y’amajonjora yo gushaka abakinnyi buzuza urutonde rwa 32 bazakina “Rwanda Challenger 75” iteganyijwe muri iki cyumweru kugeza tariki ya 2 Werurwe.Abakinnyi batatu b’Abanyarwanda ntibahiriwe n’iri jonjora kuko bose batsinzwe. Niyigena Étienne yatsinzwe n’Umunya-Pologne Daniel Michalski (6-0, 6-0), Ishimwe Claude atsindwa n’Umunya-Autriche Neil Oberleitner (6-1, 6-0) mu gihe Muhire Joshua yatsinzwe n’Umunyamerika Alafia Ayeni (6-1, 6-1).Ibi bivuze ko iri rushanwa ritanga amanota 75 ku rutonde rwa ATP, muri iki cyumweru rizakinwa nta Munyarwanda uririmo. Alafia Ayeni wasezereye Muhire Joshua, arakina n’Umunya-Slovakia Andrej Martin kuri uyu wa Mbere saa Yine mu gihe Neil Oberleitner akina na Daniel Michalski muri imwe mu mikino itandatu yo gushaka itike.Mu ijonjora rya mbere, Umufaransa Corentin Denolly umaze kumenyerwa i Kigali kubera kwitwara neza muri Rwanda Open M25, arisobanura n’Umunya-Espagne Carlos Sanchez naho Umuholandi Max Houkes ahure n’Umufaransa Maxime Janvier.Abakinnyi bane bakomeye bazakina “Rwanda Challenger 75” muri iki cyumweru ni Jesper De Jong wa 105 ku Isi, Carlos Taberner wa 174, Valentin Royer wa 183 na Calvin Hemery wa 171.Valentin Royer arakina na mwenewabo w’Umufaransa Maxime Chazal, Carlos Taberner wo muri Espagne akine na Andrea Picchione wo mu Butaliyani naho Lukas Neumayer wo muri Autriche yisobanure na Gabriele Pennaforti wo mu Butaliyani....
